Lagastofnun Háskóla Íslands

Málþing um íslenska forystu alþjóðadómstóla

atlityr — Tue, 15 Oct 2024 10:30:07 +0000

Málþing um íslenska forystu alþjóðadómstóla

atlityr 2024-10-15 - 10:30

15. október 2024

Í tilefni af 50 ára afmælis Lagastofnunar hélt stofnunin málþing í Hátíðasal HÍ 9. október sl. þar sem þrír dómsforsetar við alþjóðlega dómstóla - Páll Hreinsson, forseti EFTA-dómstólsins, Róbert R. Spanó, fyrrverandi forseti Mannréttindadómstóls Evrópu, og Tómas H. Heiðar, forseti Alþjóðlega hafréttardómsins - ræddu reynslu sína af störfum þar og áskoranir alþjóðlegra dómstóla í bráð og lengd. Benedikt Bogason forseti Hæstaréttar Íslands lauk málþinginu með stuttu erindi en stjórn málþingsins var í höndum Ásu Ólafsdóttur hæstaréttardómara.

Í setningarávarpi á málþinginu tók Jón Atli Benediktsson rektor fram að það væri ekki sjálfsagður hlutur að frá Íslandi hefðu valist lögfræðingar til forystu hjá svo stórum og virtum alþjóðlegum dómstólum. Þetta undirstrikaði hins vegar það öfluga starf sem fram færi á vettvangi Lagadeildar og Lagastofnunar og þá virðingu og það mikla traust sem lögfræðin í Háskóla Íslands nyti innan lands sem utan. Málþingið var vel heppnað og vel sótt eins og sjá má af meðfylgjandi myndum.

Rannsóknaraðstoð meistaranema

atlityr — Mon, 16 Sep 2024 10:52:58 +0000

Rannsóknaraðstoð meistaranema

atlityr 2024-09-16 - 10:52

16. september 2024

Auglýst er eftir meistaranemum við Lagadeild Háskóla Íslands í rannsóknaraðstoð á haustmisseri 2024 og vormisseri 2025. Rannsóknaraðstoðin er metin til eininga og gert er ráð fyrir að umfang vinnunnar (hvor staða) nemi 6 ECTS einingum, en vinnuframlag getur verið minna ef umsækjandi óskar eftir því. Reglur um aðstoð meistaranema Lagadeildar HÍ við rannsóknir á vegum Lagastofnunar HÍ (rannsóknaraðstoð) má nálgast hér.

Um er að ræða tvær stöður sem fyrst og fremst eru á sviði opinbers starfsmannaréttar og upplýsingaréttar, en einnig á sviði almenns stjórnsýsluréttar. Aðstoðin felst í gagnaöflun, greiningu og yfirferð á rannsóknarniðurstöðum, og tengist að mestu útgáfu ritraðar á sviði opinbers stjórnsýsluréttar sem er ritstýrt af Trausta Fannari Valssyni dósent og dr. juris Páli Hreinssyni dómara við EFTA dómstólinn. Verkefnin afmarkast nánar í samstarfi við umsjónarmann. Viðfangsefnin falla undir Rannsóknarstofu í stjórnsýslurétti, sem er rannsóknarstofa á vegum Lagastofnunar. Umsjónarmaður rannsóknarvinnunnar er Trausti Fannar Valsson dósent.

Umsóknafrestur rennur út kl. 12.00 fimmtudaginn 19. september. Umsóknum skal beint til Lagastofnunar á netfangið lagastofnun@hi.is. Við mat á umsóknum er m.a. litið til námsárangurs og annarra atriða sem máli geta skipt. Leitast verður við að svara umsóknum eigi síðar en föstudaginn 20. september. Áskilinn er réttur til að hafna öllum umsóknum. Nánari upplýsingar veita Friðrik Árni Friðriksson Hirst framkvæmdastjóri Lagastofnunar (faf@hi.is) og Trausti Fannar Valsson umsjónarmaður rannsóknarverkefnanna (tfv@hi.is).

Málstofa um gervigreind og áhrif hennar á vernd persónuupplýsinga

atlityr — Mon, 04 Mar 2024 10:56:34 +0000

Málstofa um gervigreind og áhrif hennar á vernd persónuupplýsinga

atlityr 2024-03-04 - 10:56

4. mars 2024

Á dögunum stóð Lagastofnun fyrir málstofu um gervigreind og áhrif hennar á vernd persónuupplýsinga. Málstofan, sem stýrt var af Björgu Thorarensen hæstaréttardómara, samanstóð af tveimur framsöguerindum.

Í fyrra erindinu fjallaði Hörður Helgi Helgason lögmaður um áskoranir sem þróun, innleiðing og notkun gervigreindar skapar gagnvart persónuverndarlöggjöfinni og hvert stefnir í því sambandi. Í síðara erindinu fjallaði Helga Þórisdóttir forstjóri Persónuverndar um hvernig álitaefni um notkun gervigreindar birtast í framkvæmd stofnunarinnar í dag.

Í kjölfar framsöguerinda tóku við umræður. Málstofan var vel sótt eins og sést á myndum sem fylgja fréttinni.

100 ára afmæli Húseigendafélagsins og málstofa á sviði eignaréttar

atlityr — Mon, 27 Nov 2023 09:30:50 +0000

100 ára afmæli Húseigendafélagsins og málstofa á sviði eignaréttar

atlityr 2023-11-27 - 09:30

27. október 2023

Þann 12. október sl. fór fram sameiginlegt málþing Lagastofnunar og Húseigendafélagsins í tilefni af 100 ára afmæli félagsins. Húseigendafélagið var upphaflega málsvari leigusala en hefur þróast í að verða almennt hagsmunafélag húseigenda og eru félagsmenn þess um tíu þúsund talsins. Með hliðsjón af starfsemi félagsins voru ýmis lögfræðileg málefni á dagskrá málþingsins, m.a. atriði sem varða fjöleignarhúsa-, grenndar- og nábýlisrétt. Sérstakur heiðursgestur málþingsins var Jóhanna Sigurðardóttir fyrrverandi forsætisráðherra og áður félagsmálaráðherra.

Opnunarerindi málþingsins hélt Sigurður Helgi Guðjónsson formaður Húseigendafélagsins sem fjallaði m.a. um sögu félagsins. Þá héldu erindi, í eftirfarandi röð, Tinna Andrésdóttir lögfræðingur, Víðir Smári Petersen dósent við Lagadeild HÍ og Pétur Ármannsson arkitekt, en erindin fjölluðu m.a. um grennd og nábýlisrétt og önnur viðfangsefni tengd starfsemi Húseigendafélagsins. Loks var fjallað um framtíðarsýn félagsins í erindi Hildar Ýr Viðarsdóttur varaformanns Húseigendafélagsins og aðjunkts við Lagadeild HÍ.

Málstofa á sviði eignaréttar

Fyrr á þessari önn stóð Lagastofnun ásamt Víði Smára Petersen dósent fyrir málstofu á sviði eignaréttar í tilefni af heimsókn Marc Roark, prófessors í lögfræði við University of Tulsa, hingað til lands. Á málstofunni gerði Marc grein fyrir kenningum sínar á sviði eignaréttar. Þær fjalla einkum um samband eignaréttar og húsnæðismála og hvernig byggja megi upp leigukerfi, og önnur sambærileg kerfi, þannig að þau hafi seiglu (e. „resilience“) að leiðarljósi, en taki á sama tíma tillit til mismunandi þarfa og stöðu þeirra sem hagsmuna hafa að gæta. Málstofan sem fór fram í Hátíðasal HÍ var vel sótt og spunnust þar áhugaverðar umræður um þau lögfræðilegu álitaefni sem Marc fjallaði um í erindi sínu.

Titill

Marc Roark

Kenningar Marc Roark fjalla einkum um samband eignaréttar og húsnæðismála og hvernig byggja megi upp leigukerfi, og önnur sambærileg kerfi, þannig að þau hafi seiglu (e. „resilience“) að leiðarljósi, en taki á sama tíma tillit til mismunandi þarfa og stöðu þeirra sem hagsmuna hafa að gæta.

Vel sótt málþing um kolefnismarkaði

amen — Fri, 15 Sep 2023 08:31:16 +0000

Vel sótt málþing um kolefnismarkaði

amen 2023-09-15 - 08:31

14. september 2023

Hinn 23. ágúst síðastliðinn stóð Lagastofnun fyrir málþingi í fyrirlestrasal Þjóðminjasafnsins um kolefnismarkaði og tengsl þeirra við skuldbindingar, löggjöf og stefnumótun í loftslagsmálum. Málþingið var haldið í samvinnu við Sjálfbærnistofnun Háskóla Íslands og var viðburðurinn styrktur af umhverfis-, orku- og loftslagsráðuneytinu, matvælaráðuneytinu og utanríkisráðuneytinu.

Guðlaugur Þór Þórðarson, umhverfis-, orku- og loftslagsráðherra, flutti opnunarávarp málþingsins og vék þar meðal annars að mikilvægi þess að byggja upp traust á markaði með kolefniseiningar til að þeir gagnist í baráttunni við loftslagsbreytingar.

Í kjölfarið hófst fyrri hluti málþingsins, þar sem fjallað var um viðskipti með kolefniseiningar í alþjóðlegu samhengi og helstu stefnur og strauma á alþjóðlegum kolefnismörkuðum. Þessum hluta dagskrárinnar var stýrt af Ash Sharma, stjórnanda hjá NEFCO, en auk hans tóku til máls Jonathan Wiener, prófessor í lögfræði, stjórnsýslu umhverfismála og opinberri stjórnsýslu við Duke University, Halldór Þorgeirsson, formaður Loftslagsráðs, Cathrine Wenger, lögmaður og ráðgjafi norskra stjórnvalda í loftslagsmálum, og Eve Tamme, sérfræðingur um kolefnismarkaði og alþjóðlegur ráðgjafi.

Í síðari hluta málþingsins, sem fór fram á íslensku, fjölluðu innlendir sérfræðingar og fulltrúar stjórnvalda, atvinnulífsins og umhverfissamtaka, um kolefnismarkaði frá íslensku sjónarhorni, með áherslu á þróun viðskipta á valkvæðum kolefnismarkaði hér á landi. Fundarstjóri síðari hluta málþingsins var Aðalheiður Jóhannsdóttir, prófessor í umhverfis- og náttúruauðlindarétti við Lagadeild Háskóla Íslands. Erindi fluttu Hrafnhildur Bragadóttir, aðjúnkt og doktorsnemi við Lagadeild Háskóla Íslands, og Gunnar Sveinn Magnússon, yfirmaður sjálfbærniráðgjafar Deloitte. Auk þeirra tóku þátt í umræðum Helga Barðadóttir, umhverfis-, orku- og loftslagsráðuneyti, Gunnlaugur Guðjónsson, Skógræktinni, Árni Finnsson, Náttúruverndarsamtökum Íslands, Edda Björk Ragnarsdóttir, Carbfix, Björgvin Stefán Pétursson, YGG Carbon, Guðmundur Sigbergsson, International Carbon Registry, og Reynir Smári Atlason, Creditinfo.

Fjölmargir fylgdust með málþinginu, bæði í Þjóðminjasafninu og í vefútsendingu, og sköpuðust líflegar umræður um tækifæri og álitaefni sem fylgja kolefnismörkuðum og samspil þeirra við löggjöf og stefnumótun í loftslagsmálum hér á landi.

Hægt er að horfa á upptöku frá málþinginu hér: Málþing um kolefnismarkaði 23. ágúst 2023

Málþing um kolefnismarkaði

atlityr — Thu, 10 Aug 2023 16:20:09 +0000

Málþing um kolefnismarkaði

atlityr 2023-08-10 - 16:20

10. ágúst 2023

Hvaða hlutverki gegna kolefnismarkaðir í loftslagsaðgerðum? Hvernig tengjast þeir skuldbindingum, löggjöf og stefnumótun íslenskra stjórnvalda í loftslagsmálum? Hvaða reglur gilda um viðskipti með kolefniseiningar og kolefnisjöfnun?

Lagastofnun Háskóla Íslands, í samvinnu við Sjálfbærnistofnun Háskóla Íslands, efnir til málþings miðvikudaginn 23. ágúst nk. um kolefnismarkaði og tengsl þeirra við löggjöf og stefnumótun um loftslagsmál. Málþingið fer fram í fyrirlestrasal Þjóðminjasafnsins kl. 9:00–15:15. Aðgangur er ókeypis og allir velkomnir meðan húsrúm leyfir. Einnig verður hægt að fylgjast með viðburðinum í streymi.

Málþinginu er ætlað að skapa vettvang fyrir faglega umræðu um hlutverk kolefnismarkaða í baráttunni gegn loftslagsvandanum og draga upp mynd af því hvernig þeir nýtast sem opinbert stjórntæki í loftslagsmálum og sem aðferð til að afla fjármagns í loftslagstengd verkefni. Sérstaklega verður fjallað um samspil viðskipta með kolefniseiningar við löggjöf og stefnumótun í loftslagsmálum á Íslandi og verður sjónum beint að tækifærum, áskorunum og álitaefnum sem slík viðskipti hafa í för með sér.

Dagskrá málþingsins er tvískipt: Í fyrri hluta þess, sem fer fram á ensku, munu erlendir og innlendir sérfræðingar fjalla um viðskipti með kolefniseiningar í alþjóðlegu samhengi og helstu stefnur og strauma á alþjóðlegum kolefnismörkuðum. Í síðari hluta málþingsins, sem fer fram á íslensku, munu innlendir sérfræðingar og fulltrúar stjórnvalda, atvinnulífsins og umhverfissamtaka, fjalla um kolefnismarkaði frá íslensku sjónarhorni, með áherslu á þróun viðskipta á valkvæðum kolefnismarkaði hér á landi.

Dagskrá:

Húsið opnar kl. 8:30. Heitt á könnunni.
9:00 Málþing sett
9:05 Ávarp Guðlaugs Þórs Þórðarsonar, umhverfis-, orku- og loftslagsráðherra

9:15–12:15 Fyrri hluti: Alþjóðlegir kolefnismarkaðir og þróun valkvæða kolefnismarkaðarins

Fyrirlesarar:

Jonathan Wiener, prófessor í lögfræði, stjórnsýslu umhverfismála og opinberri stjórnsýslu við Duke University
Halldór Þorgeirsson, formaður Loftslagsráðs og fyrrum stjórnandi hjá loftslagssamningi Sameinuðu þjóðanna
Cathrine Wenger, lögmaður og ráðgjafi norskra stjórnvalda í loftslagsmálum
Eve Tamme, sérfræðingur um kolefnismarkaði og alþjóðlegur ráðgjafi

Að loknum erindum verða pallborðsumræður fyrirlesara um stöðu og horfur alþjóðlegra kolefnismarkaða.

Fundarstjóri fyrri hluta málþingsins er Ash Sharma, stjórnandi hjá NEFCO, The Nordic Green Bank.

12:15–13:00 Hádegismatur

13:00–15:15 Seinni hluti: Kolefnismarkaðir í íslensku samhengi

Fyrirlesarar:

Hrafnhildur Bragadóttir, aðjúnkt og doktorsnemi við Lagadeild Háskóla Íslands
Gunnar Sveinn Magnússon, yfirmaður sjálfbærniráðgjafar Deloitte

Pallborðsumræður um aðkomu hins opinbera að viðskiptum með kolefniseiningar:

Hrafnhildur Bragadóttir, Lagadeild Háskóla Íslands
Helga Barðadóttir, umhverfis-, orku- og loftslagsráðuneyti
Benedikt Höskuldsson, utanríkisráðuneyti
Gunnlaugur Guðjónsson, Skógræktin
Árni Finnsson, Náttúruverndarsamtök Íslands

Pallborðsumræður um valkvæða kolefnismarkaðinn á Íslandi frá sjónarhóli atvinnulífsins:

Gunnar Sveinn Magnússon, Deloitte
Edda Björk Ragnarsdóttir, Carbfix
Björgvin Stefán Pétursson, Yggdrasill Carbon
Guðmundur Sigbergsson, ICR - International Carbon Registry
Reynir Smári Atlason, Creditinfo

Fundarstjóri seinni hluta málþingsins er Aðalheiður Jóhannsdóttir, prófessor í umhverfis- og náttúruauðlindarétti við Lagadeild Háskóla Íslands.

15:15 Málþingi slitið

Viðburðurinn er styrktur af umhverfis-, orku- og loftslagsráðuneytinu, matvælaráðuneytinu og utanríkisráðuneytinu.

Útgáfuhóf og málþing vegna útgáfu afmælisrits Páls Hreinssonar

amen — Tue, 23 May 2023 09:40:13 +0000

Útgáfuhóf og málþing vegna útgáfu afmælisrits Páls Hreinssonar

amen 2023-05-23 - 09:40

23. maí 2023

Hinn 12. maí síðastliðinn fór fram útgáfuhóf og málþing í tilefni af útgáfu afmælisrits vegna sextugsafmælis Páls Hreinssonar forseta EFTA-dómstólsins, og fyrrverandi prófessors og hæstaréttardómara.

Málþingið var sett með ávarpi Jóns Atla Benediktssonar, rektors HÍ, og síðan tók við Tryggvi Gunnarsson, fyrrverandi umboðsmaður Alþingis, með afmæliskveðju til Páls.

Í kjölfarið héldu erindi Valgerður Sólnes dósent, Kristján Jónsson aðstoðarmaður forseta EFTA-dómstólsins, Kristín Benediktsdóttir dósent og Kjartan Bjarni Björgvinsson héraðsdómari, sem byggðust á greinum þeirra í afmælisritinu. Í afmælisritinu er alls að finna yfir tuttugu ritgerðir á þeim réttarsviðum sem einkenna rannsóknar- og starfsferil Páls, m.a. á sviði stjórnsýsluréttar, Evrópuréttar, fjármunaréttar og réttarfars.

Útgáfuhófið og málþingið voru vel sótt eins og sést á myndum sem fylgja þessari frétt.

Hægt er að festa kaup á afmælisriti Páls Hreinssonar m.a. í vefverslun Fons Juris.

Hádegisfyrirlestur um notkun fangelsisrefsinga á Íslandi í samanburði við önnur Norðurlönd

amen — Fri, 10 Mar 2023 09:01:50 +0000

Hádegisfyrirlestur um notkun fangelsisrefsinga á Íslandi í samanburði við önnur Norðurlönd

amen 2023-03-10 - 09:01

8. mars 2023

Sakfræðifélag Íslands og Lagastofnun stóðu fyrir hádegisfyrirlestri 8. mars síðastliðinn í Lögbergi.

Emelí Lönnqvist, doktorsnemi í afbrotafræði við Háskólann í Stokkhólmi, fjallaði um meistararitgerð sína, Icelandic Exceptionalism? Systemic Punitivity in a Nordic Perspective, um notkun fangelsisrefsinga á Íslandi í samanburði við hin Norðurlöndin á tímabilinu 1989-2016.

Einnig fjallaði Emelí um PhD-verkefni sitt um notkun gæsluvarðhalds í Svíþjóð.

Ragnheiður Bragadóttir, prófessor í refsirétti við Lagadeild HÍ, annaðist fundarstjórn.

Frá fundinum

Auglýst eftir meistaranemum í rannsóknaraðstoð á vormisseri 2023

amen — Mon, 23 Jan 2023 09:01:43 +0000

Auglýst eftir meistaranemum í rannsóknaraðstoð á vormisseri 2023

amen 2023-01-23 - 09:01

20. janúar 2023

Auglýst er eftir meistaranemum við Lagadeild Háskóla Íslands í rannsóknaraðstoð á vormisseri 2023. Rannsóknaraðstoðin er metin til eininga og gert er ráð fyrir að umfang vinnunnar nemi 6 ECTS einingum.

Um er að ræða tvær stöður í aðstoð við rannsóknir á sviði rafrænnar stjórnsýslu og upplýsingaréttar. Aðstoðin felst í gagnaöflun, greiningu og yfirferð á rannsóknarniðurstöðum. Viðfangsefnin falla undir Rannsóknarstofu í stjórnsýslurétti, sem er rannsóknarstofa á vegum Lagastofnunar. Umsjónarmaður er Trausti Fannar Valsson dósent.

Umsóknafrestur er til og með miðvikudagsins 25. janúar.

Umsóknum skal beint til Lagastofnunar á netfangið lagastofnun@hi.is. Við mat á umsóknum er m.a. litið til námsárangurs og annarra atriða sem máli geta skipt. Leitast verður við að svara umsóknum eigi síðar en föstudaginn 27. janúar. Áskilinn er réttur til að hafna öllum umsóknum.

Nánari upplýsingar veitir Friðrik Árni Friðriksson Hirst framkvæmdastjóri Lagastofnunar (faf@hi.is).

Reglur um aðstoð meistaranema Lagadeildar HÍ á vegum Lagastofnunar

Rannsóknaraðstoð

Reglur um aðstoð meistaranema Lagadeildar Háskóla Íslands við rannsóknir á vegum Lagastofnunar Háskóla Íslands.

Samþykktar á deildarfundi í Lagadeild 30. janúar 2018.

1. gr.
Við upphaf hvers námsmisseris er heimilt að birta auglýsingu á heimasíðum Lagadeildar og Lagastofnunar, og eftir atvikum með öðrum hætti, þar sem óskað er eftir laganemum í meistaranámi til að aðstoða við rannsóknastörf á vegum Lagastofnunar. Í auglýsingu má tilgreina ákveðnar rannsóknir og viðfangsefni á sviði lögfræði, svo og önnur atriði eftir því sem ástæða þykir til.

Umsóknum skal beint til Lagastofnunar. Umsækjanda er heimilt að tilgreina fræðileg áhugasvið sín í umsókn og önnur atriði sem málið varða, sbr. meðal annars 3. gr.

2. gr.
Þegar umsóknir liggja fyrir skal Lagastofnun úthluta hverjum nemanda umsjónarmanni. Umsjónarmaður skal uppfylla sömu kröfur og gerðar eru til leiðbeinenda með ritgerðum í Lagadeild. Áður en úthlutun fer fram skal Lagastofnun hafa náið samráð við væntanlegan umsjónarmann um það hvernig kraftar nemenda verði nýttir með sem bestum hætti, með tilliti til yfirstandandi og fyrirhugaðra rannsókna og annarra verkefna á hverjum tíma.

Að jafnaði skal ekki greitt fyrir umsjón samkvæmt reglum þessum. Þó getur stjórn Lagastofnunar ákveðið að stofnunin greiði fyrir umsjón ef efni standa til.

Umsjónarmaður ber faglega ábyrgð á viðkomandi nemanda og sér um að skilgreina þau verkefni sem fela í sér rannsóknaraðstoð í skilningi reglna þessara. Rannsóknaraðstoð getur t.d. falist í öflun, greiningu og úrvinnslu lögfræðilegra heimilda, ritun, yfirlestur og rýni fræðitexta, álitsgerða eða dómareifana, frágangi á heimildatilvísunum, skráagerð o.fl. Leitast skal við að fela hverjum nemanda verkefni sem eru til þess fallin að auka þekkingu og innsýn nemanda í lögfræðilegar rannsóknir og akademísk vinnubrögð.

3. gr.
Nemandi fær að hámarki 6 ECTS einingar fyrir rannsóknaraðstoð samkvæmt þessum reglum með því skilyrði að hún uppfylli tilskildar gæðakröfur að mati umsjónarmanns. Rannsóknaraðstoð skal metin í klukkustundum og miða skal við að 160 stunda vinna sé metin til 6 ECTS eininga. Heimilt er að meta rannsóknaraðstoð til 2 eða 4 ECTS eininga og breytist þá tímafjöldinn að baki sem því nemur.

Nemandi skal halda skrá yfir vinnu sem hann innir af hendi vegna rannsóknaraðstoðar á þar til gerðu eyðublaði Lagastofnunar. Skráin skal geyma nákvæmar upplýsingar um fjölda vinnustunda og lýsingu á vinnu sem skulu sundurgreindar eftir dögum. Umsjónarmaður getur á hvaða stigi sem er óskað eftir því að fá að kynna sér skrána.

Á námsyfirliti skal vinna nemanda, sem hann fær einingar fyrir samkvæmt þessum reglum, auðkennd svo: Rannsóknaraðstoð á vegum Lagastofnunar.

Nemandi getur ekki fengið meira en samtals 12 ECTS einingar metnar fyrir námsvist, aðstoðarkennslu og aðstoð við rannsóknastörf samkvæmt reglum þessum.

4. gr.
Um mat á aðstoð meistaranema við rannsóknir fer samkvæmt reglum um námsvist nemenda í framhaldsnámi við lagadeild Háskóla Íslands samkvæmt 6. mgr. 93. gr. reglna fyrir Háskóla Íslands.

5. gr.
Reglur þessar öðlast gildi frá og með 30. janúar 2018.

Málstofa og útgáfuhóf vegna Eignaréttar II

amen — Mon, 23 Jan 2023 08:48:45 +0000

Málstofa og útgáfuhóf vegna Eignaréttar II

amen 2023-01-23 - 08:48

19. janúar 2023

Í tilefni af útgáfu bókarinnar Eignaréttur II eftir Þorgeir Örlygsson, Karl Axelsson og Víði Smára Petersen efndi Lagastofnun Háskóla Íslands til málstofu á sviði eignaréttar þann 19. janúar síðastliðinn.

Fundarstjóri var Friðrik Árni Friðriksson Hirst, framkvæmdastjóri Lagastofnunar.
Einn höfunda, Þorgeir Örlygsson, kynnti efni bókarinnar.

Að því loknu flutti annar höfunda, Víðir Smári Petersen, framsögu um ný álitaefni um takmörk eignaréttar að auðlindum undir yfirborði jarðar.

Þá tóku við þær Kristín Haraldsdóttir, framkvæmdastjóri dómstólasýslunnar, og Valgerður Sólnes, dósent við lagadeild Háskóli Íslands, sem brugðust við erindi Víðis með stuttum innslögum.

Að málstofunni lokinni bauð Fons Juris, útgefandi bókarinnar, upp á léttar veitingar

Lagastofnun Háskóla Íslands

Málþing um íslenska forystu alþjóðadómstóla

Málþing um íslenska forystu alþjóðadómstóla

Rannsóknaraðstoð meistaranema

Rannsóknaraðstoð meistaranema

Málstofa um gervigreind og áhrif hennar á vernd persónuupplýsinga

Málstofa um gervigreind og áhrif hennar á vernd persónuupplýsinga

100 ára afmæli Húseigendafélagsins og málstofa á sviði eignaréttar

100 ára afmæli Húseigendafélagsins og málstofa á sviði eignaréttar

Málstofa á sviði eignaréttar

Titill Marc Roark

Vel sótt málþing um kolefnismarkaði

Vel sótt málþing um kolefnismarkaði

Málþing um kolefnismarkaði

Málþing um kolefnismarkaði

Málþing um kolefnismarkaði

Dagskrá:

9:15–12:15 Fyrri hluti: Alþjóðlegir kolefnismarkaðir og þróun valkvæða kolefnismarkaðarins

13:00–15:15 Seinni hluti: Kolefnismarkaðir í íslensku samhengi

Útgáfuhóf og málþing vegna útgáfu afmælisrits Páls Hreinssonar

Útgáfuhóf og málþing vegna útgáfu afmælisrits Páls Hreinssonar

Hádegisfyrirlestur um notkun fangelsisrefsinga á Íslandi í samanburði við önnur Norðurlönd

Hádegisfyrirlestur um notkun fangelsisrefsinga á Íslandi í samanburði við önnur Norðurlönd

Frá fundinum

Auglýst eftir meistaranemum í rannsóknaraðstoð á vormisseri 2023

Auglýst eftir meistaranemum í rannsóknaraðstoð á vormisseri 2023

Reglur um aðstoð meistaranema Lagadeildar HÍ á vegum Lagastofnunar

Rannsóknaraðstoð

Málstofa og útgáfuhóf vegna Eignaréttar II

Málstofa og útgáfuhóf vegna Eignaréttar II

Titill

Marc Roark